Terorismo sa Amerika: Ilang aral para sa Pilipinas

Disyembre 7, l941 - Pearl Harbor; Setyembre 11, 2001 - New York, Washington at Pennsylvania. . . . dalawang mahalagang petsa sa kasaysayan ng bansang Amerika at ng buong daigdig, dalawang pangyayaring kinakitaan kung paano ang nasabing bansa ay naging tampulan ng habag at simpatiya ng maraming nasyon at mamamayan.

Ang una ay siyang nag-udyok sa Amerika na makilahok sa Panglawang Digmaang Pandaigdig; ang pangalawa ay ang paglulunsad nito ng pandaigdigang kampanya laban sa terorismo.

Sa pasimula ng dalawang pangyayari, ang Amerika ay biktima ng karahasan na nagdulot ng pagkasawi sa maraming buhay, pangyayaring di kapani-paniwala sa paningin ng marami dahil sa lawak at lakas ng pinsalang idinulot nito. Sa bandang huli, napagtagumpayan ng Amerika noong 1945 ang pagsugpo sa lakas ng Pasismo at Nazismo(Nazism); samantala, magtagumpay din kaya ito laban sa tinatayang salot ng makabagong daigdig --- ang terorismo?

	WTC Twin towers

Ang dahas at pinsalang tinamo ng bansang Amerika buhat sa kamay ng pinaghihinalaang utak ng karahasang naganap nitong nakaraang Setyembre 11, 2001 ay di pa lubos na natatantiya habang sinusulat ang pitak na ito. Hi-jacking ng apat (4) na malalaking eroplano sa Amerika, dalawa nito ay kinusang ibinangga sa World Trade Center (New York) na siyang ikinaguho nito; isa naman sa Pentagon (Washington); at isa sa Pennsylvania. Mahigit na 6,500 katao ang tinatayang nawawala, at habang sinusulat ang pitak na ito, mahigit na 400 ang kumpirmado ng patay. Si Osama bin Laden, isang panatikong Muslim na Arabo na hinihinalang nagtatago sa Afghanistan, ang kinikilalang ugat at puno ng nasabing karahasan. Sa kanya ngayon nakatuon ang malaking galit, hindi lamang ng bansang Amerika, kundi pati na ng mga bansang kaalyado nito --- kasama na ang Pilipinas. At dahilan sa pagkupkop ng Afghanistan sa kanya, marami pang buhay ang masasawi sa nasabing bansa sa ganting salakay na hinihinalang gagawin ng Amerika sa mga darating na araw.

Ilang leksiyon, sa paningin ng Pilipinas, ang di dapat nating kalimutan. Una, bilang kaalyado at kaibigan ng Amerika, tutol din tayo sa mga patraidor na patakaran ng terorismo. Nguni't ito ay di sapat para di natin pahalagahan ang buhay ng mga sibilyan at karaniwang mamamayan na masasawi sa labanan, maging Filipino, Afghan o Iraqui man sila. Ang buhay na masawi ay di na maibabalik, kung kaya't ang dahas, kapag ito ay sinagot ng isa pang dahas, ang kahihinatnan ay ang lalo pang kasawian ng maraming buhay.

Ang pangalawang bagay na dapat din nating isaisip ay ang pagkakaroon mismo sa ating bansa ng mga galamay ng terorismo --- halimbawa ay ang pinsalang ginagawa ng mga bandidong Abu Sayyaf sa Mindanao. Bago tayo pumalaot sa isang pandaigdigang pakikibaka laban dito, makabubuti marahil na bigyan natin ng prayoridad ang pagsugpo sa mga bandidong ito. Kapag ito ay ating napagtagumpayan, para na rin tayong nagtagumpay at nakatulong sa pandaigdigang kilusan laban sa terorismo.

Ang pangatlong leksiyon na nakikita namin buhat sa mga pangyayaring ito ay ang pinsalang idinudulot ng galit (hatred) kapag ito ay kinimkim sa puso at damdamin ng sinuman. Kapag ito ang naghari, para na rin nating isinara ang pinto ng pagpapatawad (forgiveness) sa ating kapwa. Ang kristiyanong pananaw na ito ay isa sa mga sandigan ng makabagong sibilisasyon, kung kaya't sa kabila ng maraming pamayanang problema na kinakaharap ng maraming bansa, patuloy pa rin ang pag-usad ng daigdig tungo sa kasaganaan. Sa karahasan, lahat tayo ay talo, walang mananalo.

Ang bansang Pilipinas ay di kasing unlad at kasing lakas ng bansang Amerika. Ang ating pambasang interes ay di katulad ng sa Amerika. Bagama't maraming prinsipyo, pananaw, tradisyon, kasaysayan, ugali at mga pangarapin sa hinaharap ang nag-uugnay sa dalawang bansa, ito ay di sapat para isingkaw na lamang natin sa Amerika ang ating kinabukasan. Malaya nating tahakin ang landas sangayon sa ating mga pangangailangan at naisin sapagka't ito ang kalayaang ipinamana sa atin at pinagbuwisan ng buhay ng ating mga bayani.

Sa kabila ng maraming problemang hinaharap ng bansa sa ngayon --- kasama na ang terorismo --- ang pokus at prayoridad ng Pilipinas ang dapat pa rin nating pagtuunan ng pansin...at di ang interes ng sino pa mang bansa. *

(Reprinted with permission from Kabayan Publishing Co.)

You may email the author at ernie@philippinestoday.net