|
Manila updates atbp.
Nakaraang Semana Santa. Noong Semana Santa biglang
tumahimik ang mga kalye ng Metro Manila, dahil marami sa mga
taga-Maynila ang nagsiuwian sa probinsya o nagpunta sa mga
beach. Nung Huwebes Santo naman, marami pa rin ang nagpupunta
sa mga simbahan, mga nagsasagawa ng Via Crucis at nagdarasal.
At Biyernes Santo saka nagsilikas papuntang beach...Sayang!
Ang panahon na ukol sa pagninilay-nilay ay nagiging panahon
ng pagsang-ayon sa kagustuhan ng laman. Sa mga pumupunta sa
beach, di maiwasan ang magtoma at kumain ng marami.
Watson's ng Hongkong sa Pilipinas. Ang dating Family
Drugstore at Health & Beauty Shop (pag-aari ng Shoemart)
ay naging Watson's na. May nagsabing sa pagpasok ng Watson's
meron nang kakumpetensya ang Mercury Drugstore, at magiging
mura ang mga gamot sa Mercury para ma-retain ang customers
nila. Hindi nangyari 'yon. Halos pareho ang mga presyo.
Murang Gamot ng Gobyerno. Ang Pilipinas ang isa sa
mga Asian nations na may pinakamataas ng presyong gamot. Ayon
sa isang non-government organization, ang anti-ulcer drug
na Zantac ay may presyong P2.44 sa India pero ang benta rito
ay P25.44! At kahit mura ang presyo sa India, kumikita pa
rin ang kumpanyang gumagawa nito. Sabi ng multinational drug
companies di nila kayang magbaba (o ayaw ibaba?) ng presyo.
Kaya sinimulan ng Departament of Trade & Industry at Department
of Health na mag-angkat ng gamot mula India. Nagalit ang multinational
drug companies. Sabi nila nalalagay sa panganib ang kalusugan
ng Pilipino dahil 'inferior drugs' ang mga Indian medicines.
Pero ayon sa DOH, ang mga gamot ng India ay pasado sa tests
ng ating Bureau of Food & Drugs at ng counterpart nito
sa India. Sa ngayon, meron nang murang gamot sa ilang ospital
ng gobyerno sa buong bansa.
Non-working Holiday sa Mayo 1. Idineklara ng pamahalaan
na non-working holiday na muli ang Mayo 1, at hindi Abril
29, upang ipagdiwang ang Araw ng Manggagawa. Nagalit ang mga
militanteng labor unions sa pagdeklara bilang non-working
holiday ang Abril 29 dahil ang tunay na Labor Day sa mundo
ay Mayo 1. Kahit ang mga seremonya ay sa Mayo 1, di makakadalo
ang mga manggagawa dahil may trabaho sila at lipas na ang
bakasyon nila sa Abril 29. Dagdag pa nila pinalitan ng Abril
29 ang Mayo 1 bilang non-working holiday dahil takot ang pamahalaan
na baka mag-rally muli ang mga grupong pro-Erap at maki-isa
naman ang opposiition groups.
Naging maingay ang Labor Day, pero di tulad ng last year,
relatively peaceful this year. As usual, ang mga leftists
humihingi ng resignation ni Pang. Gloria pero normal na ito
sa kanila. Kasama ng leftists ang mga oposisyon at mga galit
kay Gloria, hinihiling din ang kanyang resignation. Hindi
naman lahat ng aksyon ni Aling Gloria ay tama pero ang sabihing
katulad sya ni Erap? Sobra naman yata.
Holiday Economics. Nililipat ng gobyerno ang holidays
to a Friday or Monday dahil sa ‘holiday economics’.
Pag mahaba ang bakasyon, mas ma-enganyo ang mga taong maging
turista. Pupunta sila sa probinsya o resorts & hotels
at doon gagastos. Ang perang ginastos nila sa mga lugar na
'to ay lilikha ng trabaho sa turismo at mga industriya tulad
ng pagkain (dadami ang kita sa buko pie, durian candy, pili
etc). From personal experience, may katotohanan ang 'holiday
economics'. Nang malipat ang holiday (sa Araw ng Kagitingan
from Tuesday, Abril 9 to Monday, April 8), nagpunta ang mga
pamangkin ko sa Batangas at naligo. Nagrenta ng mga kuwarto
at nag-overnight pa sila.
IT Degrees at Trabaho. Tuloy ang popularity ng computer
or information technology (IT) degrees sa mga high school
graduates at sa taong gustong magshift sa IT career. Ang ilang
sa malalaking schools—AMA, STI at Informatics, ay nagpapalabas
ng advertisements. Problema lang, kulang ang trabaho para
sa IT grads. Umaasa ang gobyerno na sa pagdami ng mga call
centers (kumpanyang sumasagot sa reklamo, tanong, atbp. ng
customer sa Amerika) mabibigyan ng trabaho ang mga IT graduates.
Pero kulang pa rin, kaya may IT graduates na nangingibang
bansa na rin. *
|
