Kris Aquino, inaming nagkarelasyon kay Joey Marquez

	Kris Aquino

Pagkatapos silang maging laman ng blind items ng mga nakaraang buwan ay inamin na rin sa wakas ni Kris Aquino na nagkarelasyon nga sila ni Joey Marquez. Ipinahayag niya ito sa showbiz talkshow nila ni Boy Abunda matapos lumabas sa Philippine Star sa column ni Ricky Lo na bagong boyfriend niya na raw ngayon ni Vic Sotto. Nagdesisyon si Kris na magsalita dahil nasaktan siya sa artikulo na pinapalabas daw na meron siyang mga "flavor of the month" at mahilig raw siya sa mga lalaking may asawa at kilala bilang babaero (isipin niyo na lang ang mga na-link sa kanya na sina Alvin Patrimonio, Robin Padilla, Phillip Salvador, Joey Marquez at si Vic Sotto).

Ipinaliwanag ni Kris na si Vic Sotto ay isang kaibigan lamang. Labindalawang taon na raw silang magkaibigan at nahihiya nga raw siya rito dahil nasangkot ito sa intriga. Yung tungkol naman sa kanila ni Joey, inamin niya na nagsimula raw yun sa showbiz talkshow nila kung saan may interview siya rito nung maghiwalay si Joey at si Alma. Naging malapit sila sa isa't-isa simula nun. Nagustuhan niya si Joey dahil totoong tao daw ito at "normal person" ang trato sa kanya. Nagustuhan naman daw siya ni Joey dahil napapatawa niya ito.

Inamin ni Kris na mahal pa rin niya si Joey pero ito ang nakipag-break sa kanya dahil hindi pa nila kayang ibigay ang kinakailangan ng isa't-isa. Gusto raw kasi ni Joey na tumigil sa pagtratabaho si Kris pero ayaw naman ng huli daw mahal na mahal nito ang kanyang trabaho. Wala rin daw silang oras para sa isa't-isa. Merong binigay si Joey na promise ring sa kanya at suot ito ni Kris sa araw ng interview. Ayon sa kanya, ito ay nagsisimbulo ng pangako ni Joey na siya ang lalaki “who would fulfill the promises that the others were not able to keep.” Sinusuot pa rin ni Kris ang promise ring na iyon para ipa-alala niya sa sarili niya na “kung hindi ngayon, baka bukas or in a year or two baka oo na.”

Rustom Padilla, di pa rin nakaka-recover kay Carmina Villaroel

Rustom Padilla

Matagal na ring tahimik ang isyu tungkol sa hiwalayang Rustom Padilla at Carmina Villaroel matapos mag-file ng annulment ang huli noong 1998. Kahit na nagkaanak na si Carmina ng kambal courtesy ni Zoren Legaspi ay wala ring masyadong narinig mula sa kampo ni Rustom. Pero lahat ng mga isyung ito ay naglabasan na naman ng mabalitang nag-away sina Daniel Fernando at Rustom dahil sa pagkasali ni Zoren sa isang basketball event kung saan host si Rustom. Gusto ni Rustom na huwag na palaruin si Zoren at paalisin na lamang ito pero hindi naman pumayag si Daniel Fernando at mga kasamahan nila sa basketball team. Dito napatunayan ng lahat na pagkatapos ng limang taon ay may kimkim pa rin ng sama ng loob si Rustom sa nangyari sa kanila ni Carmina.

Hindi pa natapos ang nasabing isyu ay lumabas naman ang balitang napawalang-bisa na ang kanilang kasal. Dito na nagsalita si Rustom dahil nalatha sa mga pahayagan ang mga rason kung bakit nagkaroon si Carmina ng “psychological incapacity” kaya hindi nito magampanan ang tungkulin bilang asawa kay Rustom. Ilan dito ay low sex drive, pambubugbog, pagseselos, insecurity, etc. ni Rustom. Lahat ng ito ay pinabulaan ni Rustom at sinabi niya na merong third party kaya sila naghiwalay. Hindi raw sila nagkaanak ni Carmina dahil desisyon nilang itago ang kanilang relasyon sa publiko. Ito ay sa dahilang breadwinner si Carmina at kalahati ng kita niya ay napupunta sa kanyang pamilya.

Bago lumabas ang desisyon tungkol sa kanilang annulment ay may pahiwatig si Rustom na baka magsampa ito ng kasong adultery laban kay Carmina. Pero ngayong napawalang-bisa na nga ang kanilang kasal ay sinasabing tanggap na raw ni Rustom ang desisyon ng korte at wala na raw itong balak umapela. Minabuti nitong magbakasyon na lamang sa Davao kesa magsumite ng appeal.

Back to top

Page 1 2 3