At your service

KASAMA kami sa simula ng Philippines Today. UGNAYAN ang tawag pa sa newsletter noon.

Ikinagagalak naming paglingkuran kayong muli sa pamamagitan ng column na ito na pinamagatan naming @ UR SERVICE.

Ang @ ay computer sign na ang basa’y AT habang ang UR ay abbreviated form of the word YOUR na madalas gamitin na text sa cellphone. Serbisyo ang ibig ipaabot ng ingles na salita na SERVICE.

Noon, makinilya pa ang gamit namin. Ngayon, high tech na lahat. May computer na’t email, may cellphone pa. Kaya sana, magpadala kayo ng inyong mga reaction, suggestions, comments or tanong na maari naming sagutin sa column na ito mula ngayon.

Nais naming ibahagi sa inyo ang nangyari kay Mang Pedro Pukyutan. Katulad ng karamihan sa ating mga kababayang migrante, lumuwas siya mula Laguna papuntang Japan para mabigyan ng mas magandang kabuhayan ang kanyang pamilya. Siyam na taon na siya rito sa Japan.

Noong madaling araw ng ika-9 ng Hulyo, inatake sa puso si Mang Pedro. Sa halip na isang napakasayang reunion nilang mag-anak sa Laguna, umuwi si Mang Pedro sa loob ng isang kabaong.

Dapat banggitin dito ang mabilis na aksyon at tulong nila Mr. Larry Sumando ng Philippine Embassy at ng lay missionary ng OPEN HOUSE na si Neddie Codog sa pagpapauwi ng labi ni Mang Pedro tatlong araw lamang mula ng kanyang kamatayan. Dapat ding banggitin dito ang magandang loob at tulong ng kanyang mga kaibigan na agad-agad ay nag-ambagan para mabayaran ang halagang umabot ng mga Y500,000 para sa funeraria at pagpapauwi ng yumaong Mang Pedro mula Japan hanggang Pilipinas via Philippine Air Lines.

Mula sa kanyang maybahay, itong email para sa lahat ng mga tumulong sa kanila:

“Maraming salamat po sa lahat ng tulong ninyo sa aming pamilya. Napakalaki po ng halagang ibinigay nila (ng mga taga-Tsukuba International Catholic Church) sa tulong ninyo.

“Sa totoo po ang ginastos namin ay utang na lahat. Sa ngayon, meron naman po kaming tindahan na napagkukunan ng pang araw-araw na gastos. Kahit po na sa Japan ang mister ko nakatulong po ako sa kanya sa paghahanap buhay. Alam ko na mahirap ang trabaho niya.

“Uuwi na po talaga siya ngayong Mayo kaya lang nabago ang isip niya - sa March na daw kasi graduation ng anak naming bunso.

“Meron po kaming sasakyan di ko po ipagbili kasi alam kong mahal niya bilang ala-ala sa amin. Ito pong computer bago lang na pinilit niya na bumili ako para sa mga anak. Noon po lagi akong nagtatanong kung bakit.

“Sa kabila ng pagdarasal ko bago matulog at sa umaga patungkol sa mister ko at sa pamilya ko. Araw-araw po ay tumatawag ang mister ko at kung araw ng linggo pagkatapos niyang magsimba. Tuwing araw ng linggo kasabay kong magsimba ang mga anak ko.

“Umasa ako na darating ang panahon na magkakasama-sama kami.

“Napakalungkot po.

“At sa dami kong kamag-anak, kaibigan  at mga taong di-kilala na kusang tumulong at dumamay nakilala ko ang tunay (sic). Tumutulong na sagutin ang tanong ko (sic). That God knows everything and every event in our lives has a purpose.

“Thanks for all the love and prayers. God bless you and your family. I’ll pray for all of you too.

“Gumagalang, Mrs. Virginia Pucyutan”

Hindi lamang ang Pucyutan family ang nakaranas ng kalungkutan nitong nakaraang buwan. Sa mga email sa amin kumakailan, nalaman namin itong mga sumusunod na malulungkot na balita:

“…mayroon na namang namatay na Pinoy sa Saitama ngayon gabi. Pero mukhang wala naman magiging problema sa pagpapadala dahil may sasagot yata…”

Ayun sa nabanggit ninyo, totoong may budget para sa pagpapauwi sa ating mga kababayan na namatay.  Hindi nila ito ibibigay ng agad-agad hanggat mayroon pagkukuhaan ng resources ang ating mga kababayan. Ang natatandaan ko lang napilitan silang maglabas ng pera 400,000 yen noong may namatay sa Yokohama. Dahil nagpadala kami ng protest letter na ang naka pirma ay mga Filipino na nagtatrabaho sa mga NGO at Filipino communities sa Urawa, Tokyo, Yokohama, Nagoya at Nagano at copy furnished ang DFA at Office of the President. Papano ba naman hindi namin gagawin iyon, yung tao 6 na buwan na walang trabaho, palipat lipat lamang sa mga kaibigan. At namatay ang taong ito sa daan dahil inatake sa puso.  Ang inisip namin noon imbes na ibayad namin ang aming nakolekta, ibibigay na lang namin sa pamilya dahil ilang buwan din hindi ito nagpapadala ng pera sa pamilya.  Ang mga anak tumigil lahat ng pag-aaral at inasa ang ikabubuhay sa mga kapatid at magulang noong namatay.

“… isang Filipino ang pangalan ay Mang Ramon ay nakabanga ng isang hapon na nagde-deliver ng dyaryo na ikinamatay ng huli.  Nakakulong ngayon ang taong ito sa Tsuchiura Police station pero under investigation pa kaya hindi maaring dalawain.  Kailangan kaming maghintay ng 10 days saka pa lamang siya madadalaw.

…may isang Pilipino ang namatay sa sakit sa puso sa Tsuchiura rin, ang pangalan ay Fernando Estimo …Pumayag ang pamilya na sunugin na lamang ang labi nito at bukas ang schedule ng pagsunog…”

Kung mayroon po kaming maipaglilingkod sa inyo, lalo na kung kayo ay may problema, paki-email lang po sa cballescas@yahoo.com o pakitawag po sa 0298-55-6154.

Maari din pong tumawag kayong deretso kay Neddie Codog ng OPEN HOUSE na itinatag ni Urawa Bishop Tani para tumulong sa mga migrante dito sa Japan. Ang kanilang numero ay ang mga sumusunod: 0285-22-0422 sa Oyama, 048-827-0055 sa Urawa, o 090-9237-8130. *

Ed’s note– Si Prof. Ballescas ay isang sociologist, dating Monbusho scholar, at ngayo’y visiting professor sa University of Tsukuba.

Back to top

We welcome our readers to contribute their articles to Philippines Today Online. If you would like to submit your article for posting at this site, please use our Submission Form.