 Karahasan
MARAMING natatanggap na tawag ang POWAC nitong nakaraang mga buwan
tungkol sa problemang violence.Tencho na nanuntok ng Performing
Artist, staff na nagbuhat ng kamay at pinay sa kapwa pinay na inggit
lamang ang naging dahilan. Tila sinasabayan pa yata ng init ng ulo
ang init ng panahon ngayon dito sa Japan. Ano ba ang dapat gawin
upang maiwasan ang mga ganitong pangyayari?
Marahil ay alam ninyong lahat na napakahirap ngayon ang maghanap
ng trabaho dito sa bansang Hapon. Lalong nagmamahal ang mga bilihin
kung kaya't apektado rin ang negosyo sa mga clubs o omise. Kumokonti
na ang customer na pumapasok dito at nanghihinayang na rin sa lapad-lapad
na gagastusin kung kaya't laging aburido si Tencho na tagapamahala
ng omise.
Napakahirap na trabaho ang maging TENCHO ng club. Kailangan nitong
makisama sa lahat ng customer gaano man kasama ang ugali nito. May
kasabihan ngang "customer is always right." Sila ang kalimitang
nasisisi ng club owner kung hindi kumita ang club. Maaari pa silang
matanggal sa trabaho kung hindi kayang palakihin ang kita sa loob
ng isang buwan. Sa kagustuhang mapuri ng club owner, pini-pressure
naman nito ang mga Performing Artists na magtawag ng customer. Nandiyan
ang mga sistema sa quota at kung anu-ano pang sistema na kalimitan
ay labag na sa mga kontratang pinirmahan ng mga PAs. Hindi na nila
namamalayan na lumalampas na sila sa mga karapatang pantao ng huli.
Kapag napapansin na hindi nagsisikap ang mga ito, andiyan ang murahin
nila at minsan ay nakapagbubuhat pa ito ng kamay. Hindi naman lahat
ay ganito. Marami rin naman akong kakilala na sa sobrang kabaitan
ay inaabuso naman ng ibang PAs.
Ang kadalasan namang inirereklamo sa Inyong Lingkod ng iba nating
kababayan ay ang mga STAFF ng club.Nang dahil sa pagkakaroon nito
ng mga itinatangi o favoritism ay hindi nagkakaroon ng magandang
samahan sa loob ng omise. Nagkakaroon tuloy ng madalas na alitan
o inggitan sa mga ito. Dapat ay maging pantay ang inyong pagtingin
sa bawat isa. Sabi nga ng marami, "trabaho lang at walang personalan."
Para naman sa ibang mga Performing Artists, iwasan naman ninyo
ang magsiraan. Tayo ring mga Pilipino ang maaapektuhan. Mayroon
kasing maninira sa customer na kesyo may asawa na si Ms.Ano sa Pilipinas
at maraming anak o di kaya'y may boyfriend na ito at ikakasal na!
Gagawin lamang ito para makuha ang atensiyon ni Mr. Customer.
Isipin sana ninyo kung bakit kayo naririto sa bansang ito. Kailangan
ninyong magtrabaho para sa inyong mga mahal sa buhay.Gawin sana
ninyo ito sa malinis at magandang paraan. Iwasan ninyo na makapanakit
ng kapwa. Magdudulot lamang ito ng malaking problema sa huli. Kung
kayo ay may mga katanungan, huwag mag-atubiling ako ay tawagan sa
numerong ito:
Philippine Overseas Workers Assistance Center (POWAC)
Operated by Japan Performing Artists Association (JPAA)
FREE DIAL: 0120 - 738- 600 (reserved for Performing Artist only
)
TEL. 03-3484-5551 FAX. 03-5561-6162 C.P.: 090-5491-8758
|
