Kaibigang tunay

Ang tunay na kaibigan ay handang makinig
Sa mga sandaling nakatikom ang bibig
Nakakaintindi sa mga pangyayari
Bukas ang tainga, puso at pag-unawa.

Siya ay kasama at kabalikat
Kahit na ang mundo ay umiiwas
Madapa man, o sa putik masadlak
Handa siyang tumulong upang tumayo muli
mula sa pagbagsak.

Kaibigan, sa paglalakbay huwag sanang mauuna

Masalimuot ang daan baka di ka masunda't
makita
Lalong mas mahirap kung nasa likuran kita
Di ko kayang mauna, kalooban ko'y mahina.

Sa paglalakbay sabayan mo ako
Tungo sa landas ng aking pagbabago.

May Salavia
Agosto, 2001

Dilemma sa hapag-kainan

ma. agnes villarino-agudana

Umuusok ang sinigang
kung saan nalulunod
sa isang mangkok na sabaw
ang bangus na nakisaliw
sa asim ng sampalok
kung saan namumula ang kamatis
sa kutya ng sibuyas.

Nanulis ang nguso
ng gutom kong bunganga
kaya't pilit inabot
ang isang kutsarang sabaw
ng bangus na nakikisaliw
sa asim ng sampalok
na kung saan namumula ang kamatis
sa kutya ng sibuyas ...

Nang bigla ay tumilapon
dahil sa iyong makabagbag-damdaming pag-ngiyaw
nagpapakyut, nagmamakaawang
hinihingi ang sabaw
at buong bangus
na nakikisaliw
sa asim ng sampalok
na may namumulang kamatis
sa pang-aasar ng sibuyas.

At ako'y nagdalawang isip
'kako'y pareho lang tayo a!
gutom din ako
ngunit bakit ako
ay kinakailangang magbanat ng buto
nang sa gayu'y malasap
itong beinte singko pisong ulam.

Habang ikaw
ay sa isang ngiyaw lamang
ay sineswerteng nabubusog
at napapadighay,
nakakatulog ng mahimbing
at malayang nakakapaghabi
ng pangarap.

NASA IBAYONG LUPAIN

Lupain ng matatayog na tore
at kumikinang na liwanag
bansa ng mga higante
na sa atin ay umaapak.

Hindi kailanman ipagpapalit
bayan nating hamak
sa puso at sa diwa
pagmamahal na tapat.

rey agudana 1994

ULAN

Gusto ko ng ulan dahil
nakakapagpa-alis agiw sa bubong
ng kaisipan, nakakarelaks,
nakakabigay ng panibagong panimula
sa paghabi ng mga pangarap.

Gusto ko ng ulan dahil
nakikita kong kalaro ng mga
dahon ang mga sumasabog na
lobo ng mga patak at sinasambulat
nito ang kasariwaan ng pag-iisip.

Gusto ko ng ulan dahil
naiwawalat ng mga buntong-hininga
ang mga paninikip ng damdamin
sa bawat sambulat ng mga
balun-balong patak ng luha ng langit.

arnel agudana
ika-18 ng Pebrero, 2001
3:14 ng hapon/Cadiz