Karaoketiquette
10 utos sa pagkanta ng karaoke mula sa
mga beteranong amateur singers
by Benny & Lynne
Walong
Pinoy na raw ang pinatay dahil sa pagkanta ng My Way
sa karaoke. Nakakakilabot isipin kung ilan pa ang nabukulan,
nasabunutan o nasaksak sa pagkanta ng I Will Always Love
You ni Whitney Houston o Hard to Say I’m Sorry
ng Chicago, na ilan lamang sa mga pinaka-trying hard
kantahin ng mga Pinoy kahit sila’y kinakapos ng hininga
o namimilipit sa pag-abot ng pitch ng mga ito.
 Dito
sa bansang Hapon, kung saan naimbento ang karaoke, wala pa
kaming narinig na ganitong madugong balita na nangyari sa
pagitan ng mga Hapon mismo. Sa mahihilig sa karaoke, maraming
mapagpipiliang lugar kung gustong magliwaliw sa ganitong paraan—
karaoke box, omise (pub o snack),
o di kaya’y sa restorang Pinoy. Dahil ang karaoke ay
isang private entertainment, na bukas para sa mga
sintonado, trying-hard at beterano, pinakasafe
o iwas-gulo ang karaoke box dahil ikaw lang at ang mga kasama
mo, na malamang sanay na sa boses mo, ang makakarinig sa iyo.
Kung baga, dito ay no holds barred, pwede kang magwala.
Pero mas mabuting sundin pa rin natin ang
tamang etiketa o tuntunin ng kabutihang asal sa pagkanta ng
karaoke. Sa 10 alituntunin na ito, mas marami ang paalalang
nagbabawal. Alalahanin natin na ang pagkanta ng karaoke ay
hindi lamang para sa mga magagaling, kundi para sa mga nais
lamang mag-relaks pagkatapos ng mahabang oras sa trabaho,
para sa mga nais mag-enjoy, makipaggimik sa barkada.
1. Palakpakan ang sino mang humahawak
ng mike sa simula at dulo ng kanta. Mas nakakataba
ng puso kung dagdagan pa natin sa gitna o sa bahaging highlight
ng kanta. Ito’y basic rule na itinuturo ng
mga mama-san sa kanilang mga talento o babae upang
mahikayat ang mga customer na kumanta lalo. Para
sa mga nag-e-enjoy lamang, ito ay courtesy
sa kapwa, hindi pambobola o pang-uuto, na nagpapalambot ng
ugnayan, nagtatanggal ng tensyon sa pagitan ng mga customer
na maaaring hindi magkakilala. Kahit sa kasama, ito’y
pagpapakita ng kagandahang loob.
2. Huwag sumabay sa kumakanta
kung hindi ka inaanyayahan. Maghintay sa sariling
kantang isinalang mo. Nakakainsultong kumuha ka ng ibang mike
at sabayan mo ang kumakanta--kahit o lalo na kung sintonado
ito--kung hindi ka naman hinihiling. Kung gusto mong sumabay
o ensayuhin ang kinakanta niya, kumanta ka na lang ng walang
mike, ngunit huwag mong lakasan o sapawan ang kumakanta.
3. Huwag mang-agaw ng kanta.
Tiyakin mong ang kinakanta mo ay isinalang mo. May mga taong
kapag nakakita ng paboritong kanta ay walang pasintabing dinadakma
ang mike at dinidedma na ang nagsalang nito. Ito’y malubhang
no-no sa karaoke.
4. Huwag magsalang ng kaparehong
kanta na magkasunod. Kahit gustung-gusto mo
ang kanta, pigilin mo ang sarili mo at maghintay ng at least
8 kanta (o isang buong display cycle ng listahan sa screen)
bago ito ipasok. Kung bagong pasok ka lang sa lugar, ugaliing
tingnan ang listahan ng mga nakasalang na kanta pagkatapos
ng bawat isa upang iwasan ang sama ng loob ng kapwa. Kung
talagang atat na atat kang kantahin ito, magpaalam ng maayos
sa pribado sa kinauukulang tao at bago magsimula, sa ibang
tao rin.
5. Huwag solohin ang mike.
Hindi nagbayad ng tiket ang mga tao upang pakinggan ang konsiyerto
mo, kaya bitawan mo ang mike pagkatapos ng isang kanta. Kung
nahihiya ang mga taong kumanta, lalo na sa simula, unahan
mo bilang warm-up at ikaw na ang magtanong at magsalang ng
mga puwede nilang kantahin.
6. Huwag magyabang.
May mga taong bago kumanta ay nagbibigay ng introng may dalang
hangin. Sasabihin pa nilang nagtamo sila ng 95 score
sa kantang ito, o nabigyan sila ng 1 lapad na tip, o napagkamalang
si Mariah Carey, o kung anu-ano pang kayabangan. Kantahin
mo na lang at hayaan mo ang tagapakinig maghusga, OK?
7. Huwag mangantiyaw o punahin
ang kanta ng iba, maliban na lang kung hinihingi ang opinyon
mo, at ibigay ito nang may paggalang at hindi nanghihiya.
May ibang ginagaya pa ang istilo o pagbigkas ng iba sa mike
mismo. Kahit sa anong sitwasyon, hindi magandang asal ang
panghihiya.
8. Bigyang puri ang nararapat
purihin. Masamang mambola, kaya sapat na ang
compulsory clap sa karaniwang manganganta. Alam naman kasi
ng tao kung ikaw ay nambibilog lang ng ulo. Subalit para sa
may ipinapakitang natatanging kagalingan, bigyan ng papuri
sa natural na paraan, huwag labis-labis.
9. Mag-ingat sa pagbibigay ng
ad lib. Ilimita ito sa pagbati ng kaarawan o
espesyal na okasyon sa tao o mga taong nasa loob ng lugar.
Huwag masyadong magdaldal. Ang karaoke ay para sa pagkanta,
at kung nais mong mag-emcee o mag-anunsyo, maghanap
ka ng programa. Kahit salitang may magandang layunin ay pinagmumulan
ng di pagkakaunawaan, selos, o pagkainis ng tagapakinig lalo
na kung sila’y nakainom na o di kaya’y hindi sanay
pagtuunan ng pansin ng di-kilalang tao.
10. Huwag humawak sa ibang tao
habang kumakanta. Huwag magpantasyang ikaw ay
may fans. Kahit gaano ka kagaling, huwag madala sa palakpak
at hiyaw at dayuhin ang bawat mesa, lalo na’t hindi
mo naman sila kilala. May mga taong pakamay-kamay at pahaplos-haplos
sa iba, nag-i-imagine na sila’y performer. Ito’y
masagwa at maaaring pagmulan ng selos at away.
Kapag masusunod n’yo ang lahat ng ito,
enjoy ang inyong karaoke time!
Back to top
|
