Ang Endless Stars ng Korea [Part I]

Alamin ang actress at actors ng Korean drama na sikat sa buong Southeast Asia

Mga dayuhang artista ngayon ang pinagkakaguluhan ng mga Pilipino. Nagsimula sa F-4 na isang grupo galing sa Taiwan, mga Koreano naman ngayon ang mga kinahuhumalingan ng mga manonood ng serye sa TV na pinamamagatang Endless Love. Tapos na ang unang serye ng Endless Love na sa orihinal ay pinamagatang Autumn Story. Tampok dito sina Song Seunghun (Johnny, sa local version), Song Hye-gyo (Jenny) at Won Bin (Andrew). Ang Autumn Story ay patok hindi lang sa South Korea kundi maging sa Taiwan, Hongkong, Malaysia, Thailand at iba pang bansa sa Asya dahil sa kakaibang kuwento nito tungkol sa isang dalisay na love triangle. Kilalanin natin ang tatlong artista na tampok sa soap opera na ito.

Song Seung-hun

Song Seung-hun (Johnny)

Ipinanganak siya noong Octubre 5, 1976, at unang nakilala bilang isang fashion model. Nagsimula siya sa pag-arte sa isang sitcom na pinamagatang Three Men, Three Women noong 1996. Ito ang naglunsad ng kanyang matagumpay na TV career. Ngunit nakilala lang siya nang lubusan noong 2000 sa TV series na Autumn Story, na tinangkilik ng mga fans hindi lamang sa South Korea kundi sa maraming bansa sa Asya. Noong 2002, gumawa siya ng pelikulang pang-internasyonal na pinamagatang So Close, isang joint project ng film outfit sa Hongkong.

Song Hye-Gyo

Song Hye-Gyo (Jenny)

Siya ang common love interest ng dalawang lalaki sa pelikulang ito. Ipinanganak siya noong Pebrero 26, 1982 at nag-debut sa showbiz sa pamamagitan ng TV series na Sunpung Obstetrician. Tulad din ng dalawa niyang kasamahan, pumailanlang ang pangalan niya sa kasikatan sa pamamagitan ng Autumn Story noong 2000. Nahirang bilang Miss Photogenic and Miss New Talent ng KBS nang taong din iyon, patuloy ang pag-angat niya sa kanyang showbiz career sa pamamagitan ng seryeng Guardian Angel noong 2001 at All In noong 2003.

Won Bin

Wong Bin (Andrew)

Bagama’t ang ginampanan niyang papel sa Autumn Story ay ang unwanted suitor sa love triangle, si Won Bin (na sa totoong buhay ay si Kim Do-jin) ang sumikat nang lubusan hindi lang sa South Korea kundi sa buong Asya. Palagi siyang nangunguna sa mga ranking ng Asian actors at napiling Most Beautiful Man sa buong mundo noong April 2002. Ipinanganak noong September 29, 1977, nagtapos ng Media & Drama si Won Bin sa isang pamantasan sa Seoul. Isang sports buff na mahilig sa taekwondo, car racing, skiing at basketball, si Won Bin ay sinusubaybayan din ng maraming Haponesa pagkatapos niyang makipagtambalan kay Kyoko Fukada sa isang TV series na pinalabas sa Japan at Korea na pinamagatang Friends. (Subaybayan sa susunod na isyu ang mga artistang tampok sa Endless Love II o Winter Sonata.)

Back to top