Tiyakin na ang inyong perang pinaghirapan ay makarating sa pinaglalaanan nito

Mga paalala sa pagpapadala ng pera

Si Mang Tomas ay madalas naglalakip ng pera sa EMS parcel o sa ordinaryong sulat na pinapadala sa pamilya sa Pilipinas. Upang hindi halata ay iniipit niya ito sa mga makakapal na patalastas na nakukuha sa counter ng mga ATM dito sa Japan. “Safe naman ang postal system ng Japan,” dahilan niya.

Dahil limang buwan niya na itong ginawa na walang kasabit-sabit, nagulat siya nang dalawang linggo na ang dumaan at hindi pa rin daw natatanggap ang kanyang padala. Sa huli, dumating din ang sulat pero walang laman na pera.

Nagreklamo siya sa post office kung saan inihulog niya ito. Subalit napagalitan pa siya ng kawani dahil bawal maglakip ng pera sa EMS at kinakailangang isaad nang tama sa declaration ang nilalaman.

May tatlong Pilipina naman na nakiusap sa lider ng kanilang iglesia na pauwi sa Pilipinas upang dalhin ang kani-kanilang sobre na may lamang pera. Salubungin daw siya ng mga tao kung kanino naka-adres ang mga sobreng ito sa airport. Ang problema’y hindi raw sila nagkita-kita dahil hatinggabi na nang nakalabas siya sa paliparan. At sa daan, naholdap daw siya. Hindi raw niya pananagutan ang mga perang nawala dahil hindi naman niya alam ang totoong laman nito at hindi rin niya kasalanan ang pangyayari.

May isa namang manggagawang masipag at matipid na nakaipon ng malaki-laking pera at isinabay ito sa padalang door-to-door cargo. Hindi niya ito maideposito sa bangko ng Hapon dahil hinihingan siya ng alien card at pasaporte upang makapagbukas ng bagong account. Marahil gusto rin niyang makatipid sa pag-aakalang malaki ang aabutin ng remittance fee kapag malaki ang halaga ng perang padala. Nagkataon namang nakasama ang bagahe niya sa isang container na may hold order sa Customs dahil naisumbong itong may kasamang bawal na epektos. Nagkataong sa paghahanap ng epektos, nahalungkat ang pera niya. Mailalarawan n’yo na sa isip ang nangyari. Subalit hindi niya rin ito mairereklamo dahil wala naman ito sa deklarasyon.

Ang pagpapadala naman sa pamamagitan ng door-to-door ay mahigpit na pinagbabawal, lalo na sa kasalukuyan na ipinatutupad ang batas laban sa money-laundering sa buong mundo. Marami na rin ang nahuling nagpapatakbo ng underground bank o yami no gink na dati nang ipinagbabawal dahil sila’y lumalabag sa Foreign Exchange Law ng bansang Hapon.

Hindi sana nangyari ang mga ito kung sistemang tiyak, mura at mabilis ang ginamit nila sa pamamagitan ng PNB-Tokyo. Kahit magkano ang ipapadala, ang remittance fee ay dalawang libong yen (Yen 2,000) lamang. At dahil ito’y bangko, garantisado ang perang padala n’yo.

Nalalayuan kayo sa opisina ng PNB sa Tokyo? Maaaring pumunta kahit saang bangko sa Japan at humingi ng tulong sa teller o sa kahit sinong tauhan nito. Sabihin n’yo lamang na nais n’yong magpadala sa pamamagitan ng ATM sa account ng PNB-Tokyo Branch sa Mizuho Bank, Kamiya-cho Branch, Ordinary Account, Account No. 2624677. Maaaring magremit sa counter subalit ang babayaran ay mas mahal kaysa sa ATM. Kung regular kayong nagpapadala buwan-buwan ay mas mabuting magpatulong kayong gumawa ng remittance card na automatic n’yong nagagamit sa susunod na pagkakataon. Ang halaga lamang ng inyong ipapadala ang papalitan. Upang mas madali n’yo itong magawa ay gupitin lamang ang nakasulat sa wikang Hapon at ipakita ito sa tauhan ng bangko.

Pagkatapos n’yong maihulog ang pera, tumawag kaagad sa PNB 0120-86-6382 (toll free) o di kaya’y sa 03-5401-3300 upang ibigay ang detalye kung sino ang nagpadala, sino ang padadalhan, saan ito ipapadala (bank-to-bank ba o door-to-door) at magkano. Maaari ring I-fax ang mga detalyeng ito sa 03-5401-3634.

Kung may tanong kayo tungkol sa pagpapadala, pagbubukas ng bagong account o paghuhulog ng pera sa Japanese bank, maaari kayong sumangguni sa tanggapan ng PNB sa 03-5401-3300.*

Back to top