Uso na naman ngayon ang paglabas ng mga listahan ng mga
pinakamaganda at pinaka-seksing kababaihan. Sino na nga ba
ang mga laging “in” sa listahan ng pinakamagandang
babae sa balat ng lupa? Madalas mapasama sa listahan sina
Jennifer Lopez, Julia Roberts, Halle Berry at Jennifer Aniston.
Ang Pinoy ay hindi nagpapahuli sa usapang pampabyuti dahil
marami rin tayong pambato. Sa survey ng FHM magazine, alam
kong pasok ang singer-actress na si Agot Isidro, ang Filipino-Austrian
co-host ng Masayang Tanghali Bayan (MTB) na si Cindy Corletto
at ang seksi star na si Diana Zubiri.
Kaya naman nagkakandarapa ang mga ordinaryong byuti sa paggaya
ng latest trends na pinapauso ng mga iniidolong babae. Hindi
nga ba’t gusto mo ring magkaroon ng kasindulas, kasingkintab
at kasinghaba ng buhok ni Lucy Torres-Gomez at MTV VJ na si
Donita Rose? Ano kaya ang sikreto nina Kristine Hermosa at
Claudine Barretto sa pagkakaroon ng flawless na kutis? Maxi-Peel.
Aba, wag mag-aksaya ng panahon. Mag-Maxi-Peel na, nang magkaroon
ng kutis-artista! At sino ba ang hindi nagpapantasyang magkaroon
ng katawang tulad kay J-Lo? Sugod na sa gym, mga mare! Mag-Pilates,
mag-Muay Thai, mag- Tae-bo, mag-running, mag-diet. Whew! Kapag
may parte naman ng katawan na gustong palakihin o paliitin,
takbo na sa derma. Itago ang mga bilbil na di dapat makita.
Pagdating sa pagpapaganda, hindi dapat magpahuli. Baka mabansagan
kang “baduy’, “jologs”, “wa-class”,
o kaya ay “cheap”.
Hindi naman masama ang magpaganda. Ito’y isang paraan
ng pag-alaga ng ating katawan at kalusugan. Nagiging masama
ito kapag nagiging sobrang vain ang isang tao. Marami sa kababaihan
ang nagiging alipin nito sa kagustuhang maging pinakamaganda
sa lahat. Nakakalimutan tuloy natin na hindi ito ang pinakamahalagang
bagay sa mundo. At may ibang paraan ng pagpapaganda na bukod
sa mura na ay tumatagal pa. Akala kasi natin lagi ay dapat
gumastos para maging maganda.
Kapag nanonood ako ng interviews sa mga artista, beauty
queen o modelo, laging naitatanong ang beauty regimen. Naghihintay
kasi lagi ang mga tao ng tips at mayroon silang checklist,
mga do’s and don’t’s. Paano ba pumuti? Ano
ba ang gagawin para mapansin din ng ibang tao ang ating byuti?
Ang ibang artista sinasabi na kumain ng maraming prutas at
uminom ng maraming tubig. Sikreto daw ‘yun ni Sofia Loren
kaya hanggang ngayon ay bongga par rin ang kanyang byuti.
Ang iba naman ay nagsasabing dapat sabayan ng sapat na tulog
at exercise. May naliligo sa gatas para manatiling parang
baby ang kutis. May nagsasabing spa ang solusyon para manatiling
maganda ang katawan.
Walang masama sa mga tips ng beauty experts. Walang masama
kung subukan ang isa, dalawa, o lahat ng tips para malaman
ang hiyang sa iyo. Kaya lang kung puro ganito lang ang gagawin
natin, baka isipin nating ang kagandahan ay panlabas lamang.
Baka makalimutan tuloy natin na lahat tayo ay ipinanganak
na maganda dahil ang tunay na kagandahan ay galing sa kalooban.
Hindi ba’t ang isang taong in-love, kahit na hindi gumamit
ng eye shadow, lip liner, foundation o mascara ay sasabihan
nating blooming kasi ang pag-ibig na nararamdaman niya ay
umaapaw. Kapag tayo’y may kagalit o may sama ng loob
na nararamdaman, hindi ito kayang patungan ng Covergirl Ultimate
Finish Liquid Powder make-up. Di rin ito matatanggal ng concealer
o ng Body Shop Tea Tree Oil Body Scrub. Lalong hindi kaya
ng powers ng Green Valley Spa Clarity Face Moisturizer at
di rin masasangga ng Hawaiian Tropic SPF 30+ Sunblock.
Para sa akin ang tunay na maganda ay ang mga taong may masayang
disposisyon sa buhay. Marunong silang magtiwala sa ibang tao
at may tiwala rin sa sarili nilang kakayahan. Malaking bahagi
ng kanilang beauty regimen ay ang paggawa ng mabuti sa kapwa,
may camera man o wala na nakatutok. Sila ang mga tao na hindi
natataranta kapag naglitawan na ang mga puting buhok. Nakakita
ka na ba ng matatanda na parang kuntentong-kuntento sa buhay,
kahit na ni minsan ay di sila naging cover ng Cosmopolitan
magazine o di man lang nakatikim ng hair wax at DKNY na damit?
May isa o dalawang lipstick sila pero di ito Bobbi Brown.
Sila ang mga babaeng di naghihintay na pansinin sila ng ibang
tao. Ang kagandahan nila ay hindi nasusukat ng anumang listahan.
Sa aking palagay, sila talaga ang dapat na hangaan pagkat
sila ang tunay ng mga diyosa ng kagandahan.*
We
welcome our readers to contribute their articles to Philippines
Today Online. If you would like to submit your article
for posting at this section, please use our Submission
Form.
