Jules Ledesma, nagsampa ng kaso laban sa manager ni Assunta

MATAPOS maging laman ng headlines ng mga diyaryo si Congressman Jules Ledesma at ang fiancee (o asawa?) nitong si Assunta de Rossi dahil sa pagka-kidnap ng dalawang anak nito ay eto at laman na naman sila ng pahayagan dahil sa away at gulong nangyayari sa pagitan ni Jules at Manny Valera na manager ni Assunta.

Ayon sa pinaka-latest na balita na nakuha natin ay nagsampa ng kasong exploitation si Jules laban Manny at P200 milyon raw ang halaga ng asuntong ito. Ang punto ng kaso ay underage daw si Assunta ng nag-bold ito sa pelikula sa ilalim ng pangangalaga ni Manny. Si Assunta rin ay nag-file naman ng kasong annulment of management contract laban kay Manny dahil gusto niyang mapawalang-bisa ang kontratang pinirmahan niya at ng kanyang ina na si Nenette Schiavone na hanggang 2007 ang effectivity.

Si Manny na unang nagsabi na sasampahan ng kasong Breach of Contract si Assunta ay mag-fa-file na raw ng counter-charges pero walang pang detalye tungkol dito as of presstime.

Nagsimula ang lahat ng kaguluhan nang magpahayag si Assunta na gusto na raw nitong umalis sa poder ni Manny. Walang problema ito kay Manny basta raw bayaran ni Assunta ang management contract nila ng P10 milyon. Ang halagang ito ay base sa computation ni Manny na kikita raw si Assunta ng P 31.8 milyon bawat taon. Sa komisyon niyang 25%, dapat ay kikita rin daw siya ng P39 hanggang P40 milyon kaya ang P10 milyon na hinihingi niyang kapalit ng management contract nila ay maliit na halaga pa. Binigyan rin ni Manny si Assunta ng karagdagang option para matapos raw ang gulo: huminto na lang daw ito sa pag-aartista pag umalis ito sa kanyang poder o di kaya ay pangatawanan na lamang nito ang pinirmahang kontrata. Sa halip na sundin ang kagustuhan ni Manny ay isinampa ni Assunta ang nasabing annulment of management contract.

Ayon kay Manny, sa kabila ng lahat ng nangyari ay kaya niyang tanggapin uli si Assunta pag bumalik ito sa poder niya. Ang di niya lang kaya ay ang pakikialam ni Jules sa career ni Assunta.

Bahay ni Diether, pinagbabaril

Diether Ocampo

Pinaulanan ng bala ang bahay ni Diether Ocampo ng mga di-kilalang tao kamakailan. Natutulog ang aktor sa kwarto nito ng mangyari ang insidente.

Ang suspetsa ng mga pulis ay may kinalaman ito sa sinasabing relasyon ni Diether sa kay Andrea Revilla na kapatid ng Videogram Regulatory Board Chairman na si Bong Revilla. Baka raw may koneksiyon ang insidente sa kampanya ni Bong laban sa mga illegal na manggagawa at dealer ng mga pirated discs. Ayon sa mga imbestigador ay dalawa na sa mga bodyguards ni Bong ang na-ambush kaya hindi nila pwedeng isantabi ang anggulong ito.

Pinabulaan naman ito ni Diether na nanghingi pa ng paumanhin sa pamilyang Revilla dahil nasangkot sila sa isyu (as of presstime ay may balitang nag-break na pala ang dalawa noong nakaraang buwan pa). Sa ngayon ay iniimbestigahan pa ang kaso pero alam na raw ni Diether kung sino ang may kagagawan ng shooting. Ang hiling na lang ng aktor sa mga taong sangkot dito ay huwag na raw mandamay ng ibang tao kung siya raw talaga ang habol ng mga ito.

Back to top

Page 1 2 3