Bati na si Jinggoy Estrada at Bong Revilla

Jinggoy Estrada (left) and Bong Revilla

MATAPOS ang mahigit sa isang taon ay nagkasundo na rin ang dating matalik na magkaibigan na si Jinggoy Estrada at Bong Revilla. Nagsimula ang lahat sa ikapitong anibersaryo ng showbiz talk show na Startalk kung saan ginanap ang interview sa dalawa ni Lolit Solis na isa sa mga hosts. Nag-usap ang dalawa on-air at doon inamin ni Bong na mali ang ginawa niyang pagtalikod sa kaibigan noong Edsa Dos.

Nasundan pa ang nasabing insidente at dito raw talaga nangyari ang totoong reconciliation ng dalawa. Naganap ito sa birthday party ng asawa ni Jinggoy na si Precy at ng kanilang anak na idinaos sa Veterans Memorial Hospital. Kabilang sa mga bisita ay ang mga kapatid ni Bong na sina Rowena at Andrea na mga kumare ng mag-asawa. Nagsimula ang "pasaring" tungkol kay Bong ng may nagtanong kay Jinggoy kung okay lang daw sa kanya kung biglang pumunta doon si Bong. Pabirong sumagot si Jinggoy na dapat isara raw ang pinto (para hindi makapasok si Bong). Pagkatapos ng ilang oras ay meron uling nagbiro at nagsabi na baka raw bumisita si Bong. Sumagot uli ng pabiro si Jinggoy na papapasukin niya na raw si Bong kung sakaling sumulpot ito sa loob ng limang minuto.

Laking gulat ng lahat, lalo na ni Jinggoy, ng pagkatapos ng mga isang oras ay bigla ngang dumating si Bong. Nagyakapan ang dalawa pero hindi pa rin sila nag-imikan. Nawala lang ang tensiyon ng pumalakpak ang lahat dahil sa pagkakasundo ng dalawa. Para kay Bong ay kompleto na ang kanyang Pasko dahil ang naganap na insidente ang hinihingi niyang Christmas gift.

Patuloy ang laban ni Kaye Torres para kay Nida Blanca

Matapos ang isang taon ay wala pa ring linaw ang pagkamatay ni Nida Blanca pero hindi nawawalan ng pag-asa ang kanyang anak na si Kaye Torres. Ayon kay Kaye, kahit nagagalit siya sa sobrang bagal ng sistema ng hustisya ay naiintindihan din naman niya ito. Iyon nga lang, naiinip siya dahil gusto niya raw mahuli ang pumatay sa mommy niya. Naniniwala raw siya na may kinalaman ang step-father niyang si Rod Strunk sa pagkamatay ng ina. Nagpapasalamat siya at kahit papano ay nasa tamang direksiyon raw ang pinatutunguhan ng kaso.

Cesar Montano, balik Pilipinas na

Bumalik na si Cesar Montano matapos ang limang buwang shooting nito sa Australia para sa pelikulang The Great Raid na hango sa librong "The Great Raid on Cabanatuan". Kasama niya sa pelikula si Benjamin Bratt ("Miss Congeniality"), Joseph Fiennes ("Shakespeare in Love") at Connie Nielsen ("The Gladiator"). Bumaba ang timbang nito sa 150 pounds mula 180 dahil dose oras ang shooting daw nila araw-araw. Unang ipapalabas ang The Great Raid sa Cannes Film Festival sa May 2003 bago ito i-release. Ang ibang Pilipino na kasama sa pelikula ay sina Bembol Roco at ang nakababatang kapatid ni Cesar na si Rommel Montano.

Back to top

Page 1 2 3